काठमाडौं– भारतीय फिल्म निर्माता करण जोहरले हालैको एक पोडकास्ट अन्तर्वार्तामा आफ्ना सन्तान यश र रूहीसँग सरोगेसीबारे अझै स्पष्ट रूपमा कुरा नगरेको खुलासा गरेका छन् ।

सन् २०१७ मा सरोगेसीमार्फत जन्मिएका यश र रूही अहिले आठ वर्षका भएका छन् । तर करणले उनीहरूको जन्म प्रक्रिया बारे अझै ठोस कुरा गरेका छैनन् ।

करण जोहरले एक पोडकास्टमा भने, ‘मैले सुरुमा बच्चाहरूलाई भनेको थिएँ कि तिमीहरू मेरो मुटुबाट आएका हौ ।’ उनले सुरुमा कवितामय ढंगमा आफ्नो अभिभावकत्वको विषयलाई प्रस्तुत गरे पनि अहिले बच्चाहरू बढ्दै जाँदा उनीहरूमा थप जिज्ञासा देखिन थालेको उल्लेख गर्छन् । 

छोरी रूहीले एक पटक भनिन्, ‘कोही त पेटबाट आउनुपर्छ नि हैन र ?’ तर त्यसपछि उनले थप प्रश्न नगरेको करणको भनाइ छ ।

करणले थप भने, ‘मैले अझै त्यो ठूलो र गम्भीर कुराकानी गर्न बाँकी राखेको छु । उनीहरूले केही बुझ्न थालेका छन्। मेरी आमा हिरू जोहरलाई उनीहरूले ‘मम्मा’ भन्छन्, तर उनीहरू बुझ्छन् कि उनी मेरी आमा हुन् र उनीहरूको हजुरआमा ।’ उनका अनुसार बच्चाहरू अहिलेको उमेरमा अलि–अलि कुरा बुझ्न थालेका छन्, तर सरोगेसीबारेको सम्पूर्ण विवरण दिन बाँकी नै छ।

करणले सरोगेसीमार्फत बाबु बन्ने निर्णयमा आफू पूर्णरूपमा गर्वित रहेको बताए । उनले भने, ‘म मेरो बच्चाहरूलाई सरोगेसी प्रक्रिया स्पष्ट रूपमा बताउनेछु। म यो निर्णयमा पूर्णरूपमा गर्व गर्छु र आशा गर्छु कि तिनीहरूले यसलाई भावनात्मक रूपमा बुझ्नेछन् र यसमा कुनै मनोवैज्ञानिक बोझ नराखून् ।’

करण जोहरको यो अभिव्यक्तिले समाजमा एकल अभिभावक, सरोगेसी र पारिवारिक संरचनाका नयाँ स्वरूपहरूबारे सकारात्मक बहस सिर्जना गरिरहेको छ । उनका अनुसार, पारिवारिक प्रेमको केन्द्रमा इमानदारी, स्वीकारोक्ति र संवेदनशीलता हुनु जरुरी छ।