काठमाडौं– नेपाली कांग्रेसकी सहमहामन्त्री डिना उपाध्यायले मोबाइल र सामाजिक सञ्जालको सदुपयोग गरेर पार्टीको विचारसँगै आ–आफ्नो क्षमता प्रदर्शन गर्न आग्रह गरेकी छन् ।  

पूर्वप्रधानमन्त्री स्व. गिरिजाप्रसाद कोइरालाको जन्मोत्सवको अवसरमा शनिबार राष्ट्रिय सभा गृहमा आयोजित कार्यक्रममा उनले मोबाइल र सामाजिक सञ्जालको दुरुपयोग नगर्न आग्रह गरेकी हुन् । 

‘हाम्रो हातमा मोबाइल छ, सामाजिक सञ्जाल छ । त्यसलाई प्रयोग गरौँ । त्यसलाई दुरुपयोग नगरौँ,’ सहमहामन्त्री उपाध्यायले भनिन्, ‘नेतालाई गाली गरेर दुरुपयोग गर्ने होइन, हाम्रो विचार, पार्टीको विचार र हाम्रो शक्ति, क्षमतालाई प्रदर्शन गरौँ ।’

उनले विगतमा आफूहरू विद्यार्थी हुँदा अहिलेको जस्तो मोबाइल फोन र सामाजिक सञ्जाल नभएको स्मरण गर्दै तत्कालीन समयमा पार्टीको विचार फैलाउन सडक र मञ्चहरू उपयोग गरेको पनि बताइन् ।