काठमाडौं– भारतीय प्रधानमन्त्री नरेन्द्र मोदीले दक्षिण कोरियासँग मिलेर काम गर्न इच्छुक रहेको बताएका छन् । सामाजिक सञ्जाल एक्समा दक्षिण कोरियाका नवनिर्वाचित राष्ट्रपति ली जे म्युङलाई बधाइ दिँदै प्रधानमन्त्री मोदीले यस्तो बताएका हुन् ।

उनले भारत र गणतन्त्र कोरियाबीच कायम रणनीतिक साझेदारीलाई थप मजबुत बनाउन पनि तयार रहेको बताए । उनले लेखेका छन्, ‘गणतन्त्र कोरियाको राष्ट्रपतिमा निर्वाचित हुनुभएकोमा ली जे म्युङलाई बधाइ । भारत र गणतन्त्र कोरियाबीच कायम रणनीतिक साझेदारीलाई थप विस्तार गर्न र मजबुत बनाउनका लागि सँगै काम गर्न इच्छुक छु ।’

ठूलो राजनीतिक रस्साकस्सीपछि ली दक्षिण कोरियाको नयाँ राष्ट्रपतिमा निर्वाचित भएका हुन् । अघिल्ला राष्ट्रपति यून सुक योलले मुलुकमा हठात् सैनिक कानुन लागू गरेपछि दक्षिण कोरिया राजनीतिक संकटमा फसेको थियो ।

नवनिर्वाचित राष्ट्रपति लीले कोरियाली प्रायद्विपमा चीर शान्ति कायम गर्न आफू प्रतिबद्ध रहेको बताएका छन् । उनले उत्तर कोरियासँग वार्ता, सञ्चार र सहकार्य गर्ने प्रतिबद्धता जाहेर गरेका छन् ।