काठमाडौं- नेकपा एकीकृत समाजवादीका अध्यक्ष माधवकुमार नेपालविरुद्ध भ्रष्टाचार मुद्दालाई उक्त पार्टीका एकजना नेताले प्रतिशोध भनेका छन् ।

समाजवादीका केन्द्रीय सदस्य अशेष घिमिरेले पूर्वप्रधानमन्त्री नेपालविरुद्ध भ्रष्टाचार मुद्दा ओलीको इगो र प्रतिशोधको परिणाम भएको बताएका हुन् ।

‘काण्डैकाण्डले जेलिएका केपी शर्मा ओलीको शासनमा निष्पक्ष छानबिन अपेक्षित छैन’, उनले भनेका छन्, ‘न्यायिक र विश्वसनीय छानबिनका लागि त जो-कोही तयार हुनुपर्छ, हामी छौँ नै । तर, विरोधीहरूलाई समाप्त पार्ने फासिवादी प्रतिशोध किमार्थ मान्य छैन, हुँदैन ।’

घिमिरेले अब यस विषयमा पार्टीमा छलफल हुने पनि जानकारी दिएका छन् । ‘यसको विषयमा पार्टीमा छलफल हुन्छ । केपी शर्माओली भ्रष्टाचारी नहुने, अरू मात्रै भ्रष्टाचारी हुने यस्तो विधिको शासनमा हुँदैन । हामी छानबिनलाई अस्वीकार गर्दैनौँ तर अध्यक्ष नेपालमाथिको मुद्दा प्रतिशोध हो ।’