काठमाडौं – सर्वोच्च अदालतले अवहेलना मुद्दामा नेपाली पेन मिडिया प्रालिका प्रधान सम्पादक दीपेश केसीलाई पाँच हजार रूपैयाँ धरौटी माग गरेको छ ।

केसीको बयानले अदालतको अवहेलनाको कसूरदार होइनन् भन्न मिल्ने अवस्था नदेखिँदा कसूरको प्रकृति हेरी मुलुकी फौजदारी कार्यविधि संहिता, २०७४ को दफा ६८ बमोजिम नगद ५ हजार रुपैयाँ धरौटी माग गरिएको सर्वोच्च प्रशासनले जनाएको छ ।

सर्वोच्च अदालतकी नायव सुब्बा कमला रेग्मीले ‘नेपाली पेन’ अनलाइन सञ्चारमाध्यमलाई समेत विपक्षी बनाई दायर गरेको निवेदनमा सोमबार न्यायाधीश कुमार रेग्मी र अब्दुल अजिज मुसलमानको संयुक्त इजलासले केसीसँग उक्त धरौटी माग गरेको हो ।

नासु रेग्मीसहित कम्प्युटर अधिकृत रमेश बजगाईंले पत्रकार केसीद्वारा सञ्चालित अनलाइनले अदालतको अवहेलना हुने काम गरेकाले संविधानको धारा १२८ (४) र न्याय प्रशासन ऐन २०७३ को दफा १७ (१) बमोजिम सजाय माग गर्दै निवेदन पेश गरेका थिए ।

उक्त निवेदनमाथि सुनुवाइ गर्दै यसअघि वैशाख १० मा प्रधानन्यायाधीश प्रकाशमानसिंह राउतले पूर्वराजा ज्ञानेन्द्र शाहसँग भेटवार्ता गरेको भनी प्रकाशित समाचारलाई लिएर सर्वोच्च अदालतले केसीलाई बयानका लागि बोलाउन आदेश दिएको थियो ।

उक्त समाचारका कारण अदालतको अवहेलना भएको भन्दै परेको रिटमा नेपाली पेन अनलाइनका सम्पादक र प्रकाशक दीपेश केसीलाई बयान दिन सर्वोच्चले वैशाख १० मा आदेश दिएको थियो।

अवहेलना मुद्दामा सुनुवाइ गर्दै न्यायाधीशद्वय अब्दुल अजिज मुसलमान र टेकप्रसाद ढुङ्गानाको संयुक्त इजलासले बयान गराउने आदेश गरेपछि केसी सोमबार उपस्थित भएका हुन् ।

‘नेपाली पेन’ अनलाइनले ‘प्रधानन्यायाधीशले पूर्वराजालाई किन भेटे’ शीर्षकको समाचार प्रशासन गरेको थियो । उक्त समाचारलाई लिएर सर्वोच्च प्रशासनले नेपाली पेन र त्यसका प्रधान सम्पादक केसीलगायत विरुद्ध अदालतको अवहेलना मुद्दा दर्ता गरेको थियो ।