काठमाडौं– भारत र पाकिस्तानबीच तनाव बढ्दै जाँदा इरानका विदेशमन्त्री इस्लामावाद पुगेका छन् । भारत प्रशासित जम्मु कश्मीरको पहलगाम क्षेत्रमा एक जना नेपाली सुदिप न्यौपानेसहित २६ जनाको ज्यान जानेगरी भएको आतंककारी आक्रमणपछि भारत र पाकिस्तानबीच युद्ध हुने त्रासका बीच इरानी विदेशमन्त्री इस्लामावाद पुगेका हुन् ।

विदेशमन्त्री अब्बास अराघची एक दिन पाकिस्तान भ्रमणका क्रममा सोमबार इस्लामावाद पुगेको पाकिस्तानी सञ्चार माध्यमले जनाएका छन् । पाकिस्तानको विदेश मन्त्रालयले इरानी विदेशमन्त्रीले भ्रमणका क्रममा भारत पाकिस्तान तनावका विषयमा छलफल गर्नेबारे केही उल्लेख गरेको छैन ।

यद्यपि पाकिस्तानका लागि इरानी राजदूत रेजा अमिरी मोघदामले भने भारत र पाकिस्तानबीच जारी तनावबारे पनि छलफल हुने जनाएका छन् ।

इस्लामावादपछि इरानी विदेशमन्त्री यसै साता भारतको भ्रमणमा पनि जाने अपेक्षा गरिएको छ ।