विराटनगर- कोशी प्रदेशका मुख्यमन्त्री हिक्मतकुमार कार्कीले पहाडी क्षेत्रको बसाइँसराई रोक्ने योजना बनाउनुपर्ने बताएका छन् ।

विराटनगरमा प्रदेश योजना आयोगको आयोजना तर्जुमा गोष्ठीलाई सम्बोधन गर्दै मुख्यमन्त्री कार्कीले पहाडबाट तराईमा बसाइँ सर्ने प्रवृत्ति अत्यधिक रहेकोले त्यसलाई रोक्ने योजना बनाएर कार्यान्वयन गर्नुपर्ने बताए ।

उनले असन्तुलित बजेट वितरणलाई रोकेर समानुपातिक र कामयाबी बजेट बनाउनुपर्नेमा जोड दिए।

पहाडी क्षेत्रको जनजीवन सहज बनाउने रोजगारी सिर्जना गर्ने विषयलाई प्राथमिकता दिनुपर्नेमा जोड दिँदै मुख्यमन्त्री कार्कीले भने, ‘हामी जति लगानी गरेर योजनाका काम गर्छौं, हाम्रा लक्ष्य र उद्देश्य पूरा हुनुपर्छ ।’

उनले लगानी गरेका कामहरूबाट आम्दानी हुनेगरी योजना बनाए प्रदेशको आर्थिक स्रोत पनि बलियो हुनेबताए । मुख्यमन्त्री कार्कीले प्रदेशको स्रोत सीमित भएकोले अब पर्यटन क्षेत्रमा लगानी गरेर प्रदेशलाई पनि आम्दानी हुने गरी काम गर्नुपर्ने उल्लेख गरे ।

स्थानीय तहले पर्यटनको क्षेत्रमा लगानी गर्दा हामीले पनि संयुक्त रुपमा लगानी गरेर त्यसको आम्दानी प्रदेश र स्थानीय तहलाई बाँड्ने गरी योजना ल्याउनुपर्नेमा उनले जोड दिएका छन् ।