काठमाडौं – ५० हजार दक्ष भारतीय युवालाई जापान लैजाने विषयमा दुई मुलुकबीच छलफल भइरहेको जापानका लागि भारतीय राजदूत सिबी जर्जले बताएका छन् ।

भारतीय समाचार संस्था एएनआईसँगको कुराकानीका क्रममा राजदूत जर्जले अबका केही वर्षभत्रि ५० हजार दक्ष भारतीय युवालाई लैजान जापान सकारात्मक रहेको जनाएका हुन् ।

उनले भारतमा रहेका जापानी कम्पनीको संख्या हाल १५ सय रहेकोमा त्यसलाई बढाएर १५ हजार पु-याउने लक्ष्य रहेको समेत उल्लेख गरे । एएनआईसँगको कुराकानीका क्रममा दुई मुलुकबीचको सम्बन्ध उत्कृष्ट रहेको बताउँदै उनले यस सम्बन्ध जनस्तरमा पनि विस्तार भइरहेको जानकारी दिए ।

उनले सुरक्षा र समृद्धिका लागि दुबै मुलुकको धारणा समान रहेको समेत टिप्पणी गरे । यसका साथै चाँडै जापानबाट भारतमा उच्चस्तरीय भ्रमण हुने सम्भावना रहेको जानकारी दिए ।