काठमाडौं – भारतले चाँडै हाइड्रोजन ऊर्जाबाट सञ्चालन हुने रेल सार्वजनिक गर्ने तयारी गरिरहेको छ । भारतको रेल मन्त्रालयले हाइड्रोजन ऊर्जाबाट सञ्चालन हुने रेल सार्वजनिक गर्ने तयारी गरिरहेको भारतीय सञ्चार माध्यमले जनाएका छन् ।

ईटी नाउका अनुसार भारतमा आगामी मार्च महिनाको अन्त्यसम्ममा नयाँ हाइड्रोजन रेल सार्वजनिक हुनेछ । उक्त रेल चेन्नइमा रहेको इन्टेग्रल कोच फ्याक्ट्रीले उत्पादन गर्नेछ । आर्थिक वर्ष सन् २०२३–२४ का लागि भारत सरकारले हाइड्रोजनबाट चल्ने रेलको विकास गर्न २ हजार ८ सय करोड भारतीय रुपैयाँ खर्च गरेको थियो ।

भारतले हाइड्रोजनबाट चल्ने रेलको विकासमा महत्वपूर्ण उपलब्धि हासिल गरेको छ । अरु मुलुकले ५ सयदेखि ६ सय हर्सपावरका हाइड्रोजन इन्जिनको विकास गर्दा भारतले भने १२ सय हर्सपावरको इन्जिन निर्माण गरेको छ ।

नयाँ रेल नर्दन रेलवेको दिल्ली डिभिजनअन्तर्गत सञ्चालनमा ल्याउने तयारी भइरहेको छ । यो रेल ८९ किलोमिटर लामो जिन्द–सोनिपत रुटमा चल्ने छ ।