काठमाडौं – दक्षिण अफ्रिकाले पाकिस्तानसँगको दोस्रो टेस्टलाई पकडमा राखेको छ। शनिबार दोस्रो दिनको खेल सकिँदा दक्षिण अफ्रिकाले ६१५ रन जोडेको हो।

पाकिस्तानले ३ विकेट गुमाएर ६४ रन जोडेको छ। बाबर आजम ३१ तथा मोहम्मद रिजवान ९ रनमा अविजित छन्।

दक्षिण अफ्रिकाका कासिगो रबाडाले २ तथा मार्को जेन्सनले १ विकेट लिए। यसअघि घरेलु टोली दक्षिण अफ्रिकाका लागि रेन रिकेल्टनले दोहोरो शतक बनाए। ३४३ बलमा २९ चौका र तीन छक्काको मद्दतमा २५९ रन जोडेका हुन्। कप्तान तेम्भा बभुमाले १०६ तथा केल भेरियनले १०० रन जोडे। जेन्सनले ५४ बलमा ६२ तथा नवौँ क्रममा आएका केशव महाराजले ३५ बलमा ४० रन बनाए।

रेकिल्टेनले थुप्रै कीर्तिमान कायम गरे। उनको यो दोस्रो टेस्ट शतक हो। सन् २०१६ मा केप टाउनमै हसिम अमलापछि दोहोरो शतक प्रहार गर्ने उनी पहिलो दक्षिण अफ्रिकी ब्याट्सम्यान हुन्।

सन् २००६ मा स्टेफन फ्लेमिङले २६२ रन प्रहार गरेपछि सो मैदानमा सबै भन्दा धेरै रनको पारी खेल्ने उनी नै हुन्। भेरियनले योसहित एकै सिजनमा चार शतक प्रहार गरेर सबै भन्दा धेरै शतक प्रहार गर्ने दक्षिण अफ्रिकी विकेट किपरको कीर्तिमानसँग बराबरी गरेका छन्।