काठमाडौं- चीनबाट तस्करी गरी ल्याइएका नक्कली खैलोनाको जोखिम बढिरहेको भन्दै अमेरिकी अधिकारीले बालबालिकाका अभिभावकलाई सतर्क रहन आग्रह गरेका छन् । हालै अमेरिकी भन्सार प्रशासनले चीनबाट तस्करी गरी ल्याइएका ७ लाख ७५ हजार अमेरिकी डलरभन्दा बढी मूल्य पर्नेनक्काली खेलौना बरामद गरेपछि पछिल्लो घटनाक्रम विकास भएको हो ।

द इपोक टाइम्सका अनुसार अमेरिकी भन्सार प्रशासनले चीनबाट ल्याइएका लबुबु, मिकी माउस र अन्य खेलौना बरामद गरेको हो । यसमा १२ हजार १ सय ९१ ‘प्लश’ खेलौना, १ हजार ६ सय ६१ ब्याकप्याक, १ हजार ६ सय म्युजिक बक्स, १ हजार ४ सय ४० स्नो ग्लोबजस्ता सामग्री समावेश छन् ।

अमेरिकाको भन्सार तथा सीमा संरक्षण प्रशासनले नोरफोकमा ती खेलौना बरामद गरेको जनाइएको छ । यसको कुल मूल्य ७ लाख ७६ हजार ५ सय ६२ अमेरिकी डलर छ ।

नोरफोक बन्दरगाह क्षेत्रमा बरामद उक्त परिमाणको खेलौना वेस्ट भर्जिनिया राज्यको उड काउन्टीमा डेलिभरीका लागि लैजान खोजिएको थियो । विदाको सिजन शुरु हुँदा खेलौनाको व्यापार बढ्ने भएकाले नक्कली खेलौनाले बच्चाको स्वास्थ्य र सुरक्षामा पार्नसक्ने जोखिमबारे सतर्क रहन अभिभावकलाई अधिकारीले आग्रह गरेका हुन् ।