काठमाडौं – सेन्सर बोर्डले उदारता देखाउँदा नायक अनमोल केसी स्टारर फिल्म ‘जेरी अन टप’ प्रदर्शन स्थगित हुनबाट बचेको छ ।

बोर्डले गठन गरेको अनुगमन समितिले ‘जेरी अन टप’ले चलिचित्र जाँच पास (सेन्सर) नियमावली उल्लंघन गरेको ठहरपछि फिल्म निर्माता कम्पनीले २४ घण्टे स्पष्टीकरण सोध्ने निर्णय मंगलबार गरेको हो ।

तोकिएको समयभित्र स्पष्टीकरण नआए र चित्त बुझ्दो स्पष्टीकरण नआए फिल्मको प्रदर्शन रोकिने बोर्डले जनाएको छ ।

सेन्सर बोर्डका विज्ञ सदस्य तथा अनुगमन समितिका संयोजक सम्पन्न श्रेष्ठका अनुसार फिल्मको प्रदर्शन स्थगन गरेर स्पष्टीकरण सोध्ने अधिकार बोर्डलाई छ ।

उनी भन्छन्, ‘ प्रदर्शन रोकेर हामीले स्पष्टीकरण सोध्न सक्थ्यौं । स्पष्टीकरण चित्त बुझे मात्रै प्रदर्शन गर्न दिइन पनि सकिन्थ्यो । एक पटकलाई निर्मम नभइ हालेको हो । सेन्सर बोर्डले स्पष्टीकरण सोधेको हो ।’

श्रेष्ठका अनुसार ‘जेरी अन टप’ टिमले सेन्सर बोर्डको निर्देशनभन्दा बाहिर गएर अपशब्द भएको संवाद थपेको र सन्देशमुलक सूचना नराखेको अनुगमनका क्रममा भेटिएको हो ।

उनले स्पष्ट पारे, ‘सेन्सरमा आउँदा अपशब्द भएको स्थानको संवाद खाली थियो । पछि थपेको पाइएको हो । मध्यपान, धुम्रपान, जुवा तास खेलेको स्थानमा सन्देश पनि राख्नुभएको छैन ।’

अनुगमन समितिमा संयोजक श्रेष्ठसहित गृहमन्त्रालयका उपसचिव रवीन्द्र आचार्य, चलचित्र विकास बोर्डको सदस्य वीरेन्द्रप्रसाद भट्ट र सदस्य सचिव विशाल भण्डारी छन् ।

त्यस्तै, बोर्डले फिल्म ‘कोशेढुंगा’को थप प्रदर्शन रोक्ने भएको छ ।

यो फिल्म भदौ १२ मा प्रदर्शनमा आएर हलबाट उत्रिसकेको छ । यो फिल्मले पनि बार्डले काँटछाटँ गरेको दृश्य नहटाइ फिल्म प्रदर्शनमा ल्याएको पाइएको संयोजक श्रेष्ठले बताए ।

यो फिल्मले पनि सेन्सर बोर्डको निर्देशन र सेन्सर नियमावली पलाना नगरेको बोर्डको ठहर छ । स्पष्टीकरणको पत्राचारको जवाफ नदिएपछि बोर्डले यो फिल्म प्रदर्शनमा रोक लगाएको श्रेष्ठले बताए ।

उनले भने, ‘यो निर्णयले विदेश प्रदर्शन, च्यारिटी शो र सिक्वेल निर्माणमा असर पर्छ ।’ यी दुवै फिल्मका सम्बन्धित व्यक्ति र संस्थालाई मंगलबार नै पत्राचार गरिएको श्रेष्ठले बताए ।