काठमाडौं- नेकपा माओवादी केन्द्रबाट बिदा हुन लागेका नेता जनार्दन शर्माले मंगलबार गर्न लागेको पत्रकार सम्मेलनमा उनका विश्वासपात्र सुदन किराती नजाने भएका छन्।

केही आन्तरिक कारणले आफू पत्रकार सम्मेलनमा उपस्थित हुन नसक्ने सुदनले खबरहबलाई बताएका छन्।

यता माओवादी पार्टीका पूर्वसचिव राम कार्की भने जनार्दनको पत्रकार सम्मेलनमा उपस्थित हुने भएका छन् ।

‘आज हामी पत्रकार सम्मेलन गरेर आफ्ना केही अवधारणा सार्वजनिक गर्न लागेका छौँ’, कार्कीले खबरहबलाई भने, ‘अरू साथीहरू पनि जोडिँदै गर्नुहुन्छ, म चाहिँ आज जान्छु ।’

सुदनले भने जनार्दनले उठाएको मुद्दा र कुरालाई समर्थन गरेको तर व्यक्तिगत कारणले पत्रकार सम्मेलनमा उपस्थित हुन नसकेको बताए ।

‘जनार्दन दाइले उठाउनु भएको मुद्दा र विषय मेरो पनि हो तर आज व्यक्तिगत कारणले म पत्रकार सम्मेलनमा उपस्थित हुन सकिन’, सुदनले भने,‘कुनै हालतमा अहिले मिल्न लागेका दलहरूसँग हामी जाँदैनौँ । हामीलाई अर्को पसल थाप्नु पनि छैन, सबैको सहमति र सल्लाहअनुसार एउटा नयाँ निचोड निकाल्छौँ।’

उनले अहिले असन्तुष्ट रहेका सम्पूर्ण पक्षहरूसँग आफूहरू वार्तामा रहेको कुरा स्वीकार गरेका छन्।