काठमाडौं– नेपाल विद्युत् प्राधिकरणका पूर्व प्रबन्ध निर्देशक हितेन्द्रदेव शाक्यले आफूलाई सरुवा गर्ने सरकारको निर्णयविरुद्धमा सर्वोच्च अदालतमा रिट दर्ता गरेका छन् ।

शाक्यले आफूलाई प्राधिकरणको प्रबन्ध निर्देशक पदमै पुर्नवहाली गर्नुपर्ने भन्दै रिट दर्ता गरेका हुन् । उनको रिटलाई मंगलबार न्यायाधीश नृपध्वज निरौलाको इजलासमा पेशी तोकिएको छ ।

सर्वोच्चले शाक्यको पक्षमा अन्तरिम आदेश दिएमा उनी प्राधिकरणको प्रबन्ध निर्देशकको जिम्मेवारीमा फर्कने छन् ।

जेन-जी आन्दोलनपछि सुशीला कार्की नेतृत्वमा बनेको सरकारले मन्त्रिपरिषद्को निर्णयमार्फत शाक्यको सरुवा गरेर मनोज सिलवाललाई प्राधिकरणको प्रबन्ध निर्देशक नियुक्ति गरेको थियो ।