काठमाडौं – बार्सिलोनाका युवा स्टार लामिन यामालको चोटप्रति मुख्य प्रशिक्षकले चासो राखेका छन्। टिमका मुख्य प्रशिक्षक हान्सी फ्लिकले टिमको जितमा उनको भूमिका महत्त्वपूर्ण देखिए पनि चोटको समस्या अझै बाँकी नै हरेको बताएका हुन्। उनले चोटको व्यवस्थापन गरेर अगाडि बढ्नुपर्नेमा जोड दिएका छन्।

यामालबारे मुख्य प्रशिक्षकले भनेका छन्, ‘उनी अनुशासित छन्। उनको चोटलाई व्यवस्थित गर्दै तालिमसँगै उपचार गर्नुपर्छ। खेलमा चोट सकिन्छ भन्ने हुँदैन। यो आउँछ र जान्छ तर यसको व्यवस्थापन गर्नुपर्छ।’

एल क्लासिकोमा नमिठो पराजयपछि लयमा फर्किने तयारी गरिरहेको बार्सिलोनाका लागि लामिन महत्त्वपूर्ण खेलाडी हुन्।

एल क्लासिकोमा पराजयको सामना गरेको एक सातापछि भएको एल्चेविरुद्धको खेलमा यामालले उत्कृष्ट गोल गर्दै अग्रता दिलाए। हरेक खेलमा युवा स्टार १८ वर्षीय यामालले क्षमता देखाउँदै आएकाले पनि प्रशिक्षकले उनको चोटको चिन्ता गरेको देखिन्छ।