काठमाडौं– टर्कीले ३० लाख उइग्युरलाई आफ्नो देश आउन दिने सूचना मिथ्या भएको प्रस्ट पारेको छ । टर्कीको राष्ट्रपतीय सञ्चार निर्देशनालयले ३० लाख उइग्युरलाई स्वागत गर्ने विषयमा चीनसँग सम्झौता भएको भन्ने दाबीमा कुनै सत्यता नरहेको प्रष्ट पारेको हो ।

राष्ट्रपतीय सञ्चार निर्देशनालय मातहतरहेको मिथ्या सूचना प्रतिकार केन्द्रले विज्ञप्ति जारी गर्दै विभिन्न सामाजिक सञ्जालमा आइरहेको यस्तो दाबीमा कुनै सत्यता नरहेको जनाएको हो । ‘३० लाख उइग्युरलाई ल्याउने विषयमा टर्की र चीनबीच सम्झौता भएको दाबी पूर्ण रुपमा आधारहीन र मिथ्या सूचना हो ।’ विज्ञप्तिमा भनिएको छ ।

यसबारे दुई देशबीच कुनै सम्झौता वा छलफल नै नभएको विज्ञप्तिलाई उद्धृत गर्दै तुर्किएटुडेले जनाएको छ । टर्किस अधिकारीहरुले अन्तर्राष्ट्रिय रुपमा संवेदनशील मुद्दामा आधिकारिक वक्तव्यमा मात्रै विश्वास गर्न आह्वान गरेका छन् ।