काठमाडौं – पूर्व प्रधानमन्त्री डा. बाबुराम भट्टराईले सामाजिक सञ्जाल बन्द गर्ने सरकारको कदमलाई अलोकतान्त्रिक, अदूरदर्शी र प्रतिगमनकारी भनेका छन्।

भट्टराईले आफ्नो फेसबुकमार्फत प्रतिक्रिया दिँदै अहिलेको विश्वव्यापीकरण, अत्याधुनिक सञ्चार प्रविधि र उन्नत लोकतन्त्रको युगमा यस्ता ‘लहडी निर्णय’ले जनताको अभिव्यक्ति स्वतन्त्रता, प्रेस स्वतन्त्रता र सूचनाको हक कुण्ठित हुने बताएका छन्।

उनले सरकारको यस्तो कदमलाई “आफ्नै आँखामा पट्टी बाँधेर सूर्यलाई छेक्ने मूर्खतापूर्ण हर्कत” भन्दै कडा आलोचना गरेका छन्।

भट्टराईले उपयुक्त नियमनकारी नीतिहरू ल्याउने सट्टा सामाजिक सञ्जाल नै बन्द गर्ने प्रवृत्तिले लोकतान्त्रिक मूल्य मान्यतामाथि नै आघात पुग्ने चेतावनी दिएका छन्।