काठमाडौं – व्यवसायी एवम् राजावादी अभियन्ता दुर्गा प्रसाई उच्च अदालतको आदेशपछि कारागारमुक्त भएका छन्। कारागारमुक्त भएसँगै उनले सोमबार सामाजिक सञ्जालमार्फत एक स्टाटस लेख्दै साथ, सहयोग र हौसलाका लागि देश–विदेशमा रहेका नेपालीप्रति आभार व्यक्त गरेका छन्।

‘जिल्ला अदालतको आदेशले कारागार चलान हुँदा पनि म आदेशलाई शिरोपर गर्दै खुशी साथ कारागार गएको थिएँ’ उनले लेखेका छन्, ‘आज उच्च अदालतको आदेशबाट रिहा हुँदा पनि म देश निर्माणको भावी योजनाका साथ घर फर्किदैछु।’

उनले अदालतप्रति कृतज्ञता व्यक्त गर्दै भनेका छन्‘न्याय मरेको छैन भन्ने आभाष दिलाउनु हुने समस्त श्रीमानहरू सहित अदालत परिवारलाई हार्दिक धन्यवाद ।’

कारागार बसाइलाई सहज रूपमा स्वीकारेको जनाउँदै प्रसाईंले कारागारलाई पनि घरसरह मानेको उल्लेख गरेका छन्। ‘सारा नेपाल मेरो घर हो, कारागार पनि मलाई घरभन्दा फरक लागेन,’ उनले लेखेका छन्।

प्रसाईंले कारागार प्रशासन, नेपाल प्रहरी, तथा जेलमा रहेका साथीहरूको सहयोगप्रति पनि आभार प्रकट गरेका छन्। साथै, देशका लागि निरन्तर क्रियाशील रहने प्रण दोहोर्‍याउँदै उनले भनेका छन्, ‘म मेरो लागि होइन, देशकै लागि थिएँ, छु र रहिरहनेछु। तरिका र शैली बदलिन सक्छ, तर स्वभाव परिवर्तन हुँदैन।’

प्रसाईंलाई जेठ ३० गते जिल्ला अदालतको आदेशअनुसार डिल्लीबजार कारागार चलान गरिएको थियो। तर उच्च अदालतले विभिन्न फरक मुद्दामा उनीमाथिको मुद्दामा २८ लाख धरौटी लिएर रिहा गर्न आदेश दिएको हो। अदालतको आदेशसँगै उनी सोमबार जेलमुक्त भएका छन्।