बेइजिङ– गत जुलाई २३ मा चीनको भित्री मङ्गोलिया क्षेत्रमा रहेको एउटा खानीमा भएको दुर्घटनामा परी नर्थइस्टर्न विश्वविद्यालयका छ विद्यार्थीको मृत्यु भएको छ ।

खानीको औद्योगिक फ्लोटेशन ट्यांक अवलोकन गर्ने क्रममा ग्रिड प्लेट भाँचिदा उनीहरू ट्यांकीमा खसेर डुबेका थिए । यो खानी चाइना नेशनल गोल्ड ग्रुपको सहायक कम्पनी झोङ्जिन गोल्डले सञ्चालन गर्दै आएको छ ।

दुर्घटनामा एक शिक्षक पनि घाइते भएका छन् । दुर्घटनाले चिनियाँ सामाजिक सञ्जालमा ठूलो आक्रोश निम्त्याएको छ ।

चिनियाँ सामाजिक सञ्जाल वेइबोमा यसै विषयसँग सम्बन्धित ह्यासट्यागले एक घण्टामै १० करोडभन्दा बढी भ्यूज पाएको थियो । सामाजिक सञ्जाल प्रयोगकर्ताहरूले सुरक्षा मापदण्डको कमी र कम्पनीको लापरबाहीमाथि प्रश्न उठाएका छन् ।

चिनियाँ सञ्चारमाध्यमले यसलाई राष्ट्रिय त्रासदीको संज्ञा दिएका छन् । सरकारले दुर्घटनाको कारण पत्ता लगाउन र सुधारात्मक उपाय प्रस्ताव गर्न अनुसन्धान टोली गठन गरेको छ ।

पछिल्लो समय चीनमा बारम्बार यस्ता औद्योगिक दुर्घटनाहरु हुने गरेका छन् । कमजोर सुरक्षा प्रबन्धका कारण यस्तो दुर्घटना हुने गरेको बताइन्छ ।