वाशिङ्टन – अमेरिकी आप्रवासी एजेन्टले मेक्सिकोका चर्चित मुक्केबाज ३९ वर्षीय जुलियो सेजर चाँभेजलाई गिरफ्तार गरेको छ। अमेरिकी अधिकारीका अनुसार सङ्गठित अपराधमा संलग्न भएकाले उनलाई डिपोर्ट गर्ने तयारी गरिएको छ।

गिरफ्तार हुनु केही दिन अघि उनी क्यालिफोर्नियामा भएको फाइटमा जेक पाउलसँग पराजित भएका थिए। अमेरिकी अधिकारीले उनी लागुपदार्थ ओसार पसारमा संलग्न भएको आरोप लगाएका छन्। सो आरोपलाई सेजरका वकिलले अस्वीकार गरेका छन्।

सेजर मेक्सिको बक्सिङ इतिहासकै सर्वकालिक उत्कृष्ट ठहर भएका जुलियो सेजर चाँभेज सिनियरका छोरा हुन्। होमल्यान्ड सेक्युरिटी कार्यालयबाट जारी विज्ञप्ति अनुसार सेजर जुनियर गोला बारुद र विस्फोटक पदार्थ ओसार पसार गर्नुका साथै अन्य सङ्गठित अपराधमा संलग्न भएको आरोपमा उनी माथि मेक्सिकोमा पनि वारेन्ट जारी गरिएको छ।

अमेरिकी राष्ट्रपति डोनाल्ड ट्रम्प जनवरीमा कार्यालयमा प्रवेश गरेको पहिलो दिन नै आतङ्ककारी घोषित सिनाओला कार्टेलमा पनि उनी आबद्ध भएको अनुमान गरिएको छ। गत वर्ष अमेरिकी नागरिकसँग विवाह गरेपछि उनले स्थायी बसोबासमा लागि निवेदन दिएका थिए।
यसअघि पनि उनी धेरै पटक गिरफ्तार भएका थिए। यसरी गिरफ्तार भएका उनी धेरै पटक हात हतियारको विषयमा गिरफ्तार भएका हुन्।

सन् २०२३ मा पनि स्थानीय न्यायालयले उनलाई हतियार ओसार पसारको आरोपमा गिरफ्तारको आदेश दिएको थियो।