काठमाडौं- पाकिस्तानसँगको सिन्धु जलसन्धि निलम्बन गरेपछि भारतले आइतबार चिनाब नदीको पनि पानी रोकेको छ।

समाचार एजेन्सी पीटीआईका अनुसार, जम्मु-कश्मीरको रामबनमा बनेको बागलिहार बाँधबाट चिनाबको पानी रोकिएको हो ।

उता, कश्मीरमा किशनगंगा बाँधमार्फत् झेलम नदीको पानी रोक्ने योजना पनि भारतले तयार गरिसकेको छ ।

यसैबीच, एयर चीफ मार्शल अमरप्रीत सिंहले आइतबार प्रधानमन्त्री नरेन्द्र मोदीसँग भेट गरेका छन् ।

स्रोतहरूका अनुसार, प्रधानमन्त्री र एयर चीफ मार्शलबीच २७ जनाको ज्यान जाने गरी भएको पहलगाम हमलासम्बन्धी कुराकानी भएको थियो।

२२ अप्रिलमा भएको पहलगाम आतंकवादी हमलामा नेपालीसहित २७ जना मारिएका थिए । यो हमला भएको १२ दिन बितिसकेको छ ।

तर, भारतले यसअघि जस्तो पाकिस्तानविरुद्ध कारबाही गर्न सकेको छैन । पाकिस्तानसँगको तनावबीच प्रधानमन्त्री मोदीले सेनाका उच्च अधिकारीहरूसँग निरन्तर बैठक गर्दै आएका छन्। शनिबार उनले नेभी प्रमुखसँग भेट गरेका थिए।