काठमाडौं- सोमबार राति ११ बजेदेखि ३ बजेसम्म त्रिभुवन राजपथको नागढुंगा-नौबिसे सडकखण्ड बन्द हुने भएको छ।

यो सडकमा यातायात बन्द गरी निर्माणलाई तीव्र पारिने भएको छ । नागढुंगा- नौबिसे सडकखण्ड अन्तर्गतको पिप्लामोड क्षेत्रमा सडक मर्मत र सुधारका लागि सोमबारदेखि रातिको समयमा यातायात बन्द गरिने भएको हो ।

नागढुंगा-मुग्लिङ सडक योजना (पूर्वी खण्ड) अन्तर्गत नागढुंगा, पिप्लामोड, नौबिसे क्षेत्रमा सडक मर्मत तथा कालोपत्रे भइरहेको छ ।

नागढुंगा-मुग्लिङ सडक योजना (पूर्वी खण्ड) ले सूचना जारी गरी सम्बन्धित जिल्ला प्रशासन कार्यालयको समन्वयमा वैशाख २२ देखि वैशाख ३१ गते राति ११ बजेदेखि ३ बजेसम्म सवारीसाधन आंशिक रूपमा रोकिने जनाएको छ ।

काठमाडौँबाट जाने सवारीसाधन नागढुंगा चेकपोस्टमा रोकिने भएका छन् । नौबिसेबाट काठमाडौंतर्फ आउने सवारीसाधन खत्रपौवा पुलमा रोकिने छ ।

आयोजनाले विकल्पमा सीतापाइला-भीमुढंगा-राम कोट-धार्के सडक तथा सामाखुशी-टोखा-गुर्जेभञ्ज्याङ छहरे-त्रिशूली-गल्छी सडक प्रयोग गर्न भनेको छ ।

तस्बिर : नेपाल फोटो लाइब्रेरी