काठमाडौं – राष्ट्रिय स्वतन्त्र पार्टीका नेताहरू अनौपचारिक छलफलमा जुटेका छन्। पार्टी सभापति रवि लामिछानेलाई उच्च अदालतले थुनामा पठाउने आदेश दिएसँगै नेताहरु जुम बैठकमार्फत अनौपचारिक छलफलमा जुटेका हुन् ।

छलफलमा भोलि चितवनको कार्यक्रम सभापति बिना नै अगाडि बढाउने या रोक्ने भन्ने विषयमा कुराकानी भइरहेको बुझिएको छ । केही नेताहरु सभापति निवासमा पुगेका छन् भने केही नेताहरू जुम मार्फत जोडिएका छन्।

यसअघि जिल्ला अदालत रुपन्देहीको आदेश बदर गर्दै उच्च अदालत तुलसीपुरले सभापति लामिछानेलाई थुनामा पठाउने आदेश दिएको थियो । उच्च अदालत तुलसीपुरको बुटवल इजलासका न्यायाधीश रमेश ढकाल र स्वीकृति पराजुलीको इजलासले रविलाई थुनामा पठाउने आदेश गरेको हो ।

यता रवि लामिछानेले सामाजिक सञ्जाल मार्फत एक स्टाटस लेख्दै आफूले आजै गिरफ्तारी दिने बताउँदै भोलिका लागि तय भएको चितवनको भेला नरोक्न नेताहरुलाई निेर्दशन दिएका छन् ।

उनले सामाजिक सञ्जालमा लेखेका छन्, ‘ सम्मानित अदालतको आदेशको सम्मान गर्दै म आफै आजै अहिले नै गिरफ्तारी दिदैछु। साथै न्यायलयका अन्य ढोकाहरु मेरा लागि खुल्ला होलान् नै । न्यायका लागि दुनियाँका सबै ढोका ढकढकाउछु । म माथि ठुलो अन्याय भएको छ ।चितवनको सभा नरोक्नुस्।’