काठमाडौं– आकर्षक तलबको प्रलोभनमा पारी वैदेशिक रोजगारीमा पठाइदिने नाममा ठगले लाखौं रकम सर्वसाधारणबाट कुम्ल्याउँदै आएका छन् । सर्वसाधारणलाई ठगी गर्ने यस्तै गिरोहलाई काठमाडौं उपत्यका अपराध अनुसन्धान कार्यालय टेकुले नियन्त्रणमा लिएको छ ।
आकर्षक तलबको प्रलोभनमा पारी पोल्याण्ड पठाइदिन्छु भन्दै रकम ठगी गरेको अभियोगमा ३ जनालाई प्रहरीले पक्राउ गरेको हो ।

पक्राउ पर्नेहरूमा टोखा–१ घर भई बुढानिलकण्ठ–६ बस्ने ३० वर्षीय राजुविक्रम राणा, ३५ वर्षीया रोशनी राणा र टोखा बस्दै आएका कञ्चनपुर वेदकोट–१० घर भएका ३३ वर्षीय भीमबहादुर महर छन् ।

राजु र रोशनीले पोल्याण्ड पठाइदिन्छु भन्दै १ जना पीडितबाट ४ लाख १२ हजार रूपैयाँ असुलेका थिए ।
यस्तै भीमबहादुरले २ जना पीडितबाट २ लाख रूपैयाँ लिई सम्पर्कविहीन भएका थिए ।
पीडितहरूको उजुरीको आधारमा प्रहरीले राजु र रोशनीलाई काठमाडौं–६ बौद्धबाट पक्राउ गरेको हो । यस्तै भीमबहादुरलाई काठमाडौं–२६ बाट पक्राउ गरिएको प्रहरीले जनाएको छ ।
पक्राउ परेकाहरूलाई आवश्यक अनुसन्धान तथा कारबाहीका लागि वैदेशिक रोजगार विभाग ताहाचल पठाइएको प्रहरीले जनाएको छ ।