सियोल – दक्षिण कोरियाली राष्ट्रपति युन सुक योलको बारे शुक्रबार संवैधानिक अदालतले निर्णय गर्दै छ। राजधानी सियोलका सडकमा उनको समर्थन र विरोधमा मानिस जम्मा भएका छन्। महाअभियोग लागेका राष्ट्रपति पदमुक्त हुने या फेरि राष्ट्रपति कार्यालय फर्कने भन्ने कुराको निर्णय संवैधानिक अदालतले गर्ने छ।

डिसेम्बर महिनामा योलले सैनिक शासन घोषणा गरेयता दक्षिण कोरियाको राजनीति अस्थिर बनेको छ। संसद्ले महाअभियोग लागे पछि उनी पदमुक्त भएका थिए।

संवैधानिक अदालतले उनको पक्षमा निर्णय गरेमा फेरि पदमा फर्कने छन्। अन्यथा दक्षिण कोरियामा ६० दिन भित्रमा निर्वाचन हुनेछ। उनी माथि देश द्रोहको मुद्दा पनि छ। शुक्रबार नै यसका बारे बहस हुने जनाइएको छ। ३ डिसेम्बरका दिन योलले सैन्य शासनको घोषणा गरेका थिए। दुई घण्टामा नै त्यो निर्णय उल्ट्याए पनि संसद्ले उनलाई महाअभियोग लगाएको थियो। साथै कानुनी व्यवसायीले देश द्रोहको मुद्दा समेत लगाए। विपक्षीले कार्य बाहक राष्ट्रपति हान डुक सुमाथि पनि महाअभियोग लगाइसकेका छन्।

जनवरीमा गिरफ्तार भएका युन मार्च महिनामा रिहा भएका थिए। संवैधानिक अदालतमा आठ जनाको बेन्चले यो निर्णय गर्ने छ। सात जनाले महाअभियोग स्वीकार गरेमा महाअभियोग लाग्ने छ। दक्षिण कोरियाको संविधानमा सैन्य शासन युद्धको समयमा या त्यसै किसिमको सङ्कटमा मात्र लगाउन पाइने व्यवस्था छ। यसअघि १४ डिसेम्बरमा २०४ जना विधायकले महाअभियोग पारित गरेका थिए।