काठमाडौं– स्वास्थ्य तथा जनसंख्यामन्त्री प्रदीप पौडेलले चिकित्सक र नर्सहरूलाई श्रम ऐनले व्यवस्था गरेबमोजिम पारिश्रमिक कडाइकासाथ लागू गर्ने गरी सरकारले काम अघि बढाइरहेको बताएका छन् ।

मंगलबार काठमाडौँमा नेपाल चिकित्सक संघको ७५औँ स्थापना दिवसको अवसरमा आयोजित कार्यक्रमलाई सम्बोधन गर्दै उनले यस्तो बताएका हुन्।

‘कम्तीमा श्रम ऐनले व्यवस्था गरेबमोजिम सिपयुक्त जनशक्तिलाई दिनुपर्ने न्यूनतम तलब दिनुपर्छ । त्यो कडाइका साथ लागू गर्ने गरी एकदम अघि बढिरहेका छौँ’, उनले भने ।

उनले एकै पटक लोकसेवा आयोगबाट पाँच सय चिकित्सक लिनका लागि मन्त्रीपरिषद्बाट सैद्धान्तिक स्वीकृति लिइसकेको पनि बताए । चिकित्सक र नर्सहरूको पारिश्रमिक सरकारी पनि बढाउने र निजीमा पनि बढाउन आग्रह गर्ने गरी सरकार अघि बढेको उनको भनाइ छ ।

मन्त्री पौडेलले नेपाली चिकित्सा शिक्षा विश्वमै विश्वसनीय बनेको बताए ।