काठमाडौं – काठमाडौंमा जारी त्रिकोणात्मक टी–२० आई महिला शृङ्खलाको चौथो खेलमा पनि घरेलु टोली नेपाल पराजित भएको छ । 

त्रिवि क्रिकेट मैदान कीर्तिपुरमा मंगलबार भएको खेलमा नेपाल थाइल्यान्डसँग पाँच रनले पराजित भएको हो । पराजयसँगै नेपाल उपाधि होडबाट बाहिरिएको छ । थाइल्यान्डले प्रस्तुत गरेको १०७ रनको लक्ष्य पछ्याएको नेपालले निर्धारित २० ओभरमा आठ विकेट गुमाउँदै १०१ रन मात्रै बनाउन सक्यो । 

नेपालका लागि रुबिना क्षेत्रीले सर्वाधिक २६ रन जोडिन् । थाइल्यान्डका लागि थिपचा पुत्थावोंगले ४ तथा फतिन्ना मायाले २ विकेट लिइन् ।

त्यसअघि टस जितेर ब्याटिङ रोजेको थाइल्याण्डले निर्धारित २० ओभरमा ६ विकेट गुमाएर १ सय ६ रनको मध्यम योगफल तयार गरेको थियो । थाइल्यान्डका लागि चानिदा सुत्थीरुआंगले सर्वाधिक २७ रन जोडिन् । नेपालका लागि मनिषा उपाध्यायले ३, पुजा महतो र रचना चौधरीले समान १ विकेट लिइन् । 

नेपालले अव बुधबार नेदरल्यान्ड्स र अन्तिम खेलमा थाइल्यान्डसँग खेल्ने छ ।