काठमाडौं– संघीय संसद्को चौथो ठूलो दल राष्ट्रिय स्वतन्त्र पार्टी (रास्वपा)को केन्द्रीय समिति बैठक जारी छ । स्वयम्भू स्टार बैंकेटमा शनिबार बिहान ७ बजेबाट रास्वपाको बैठक सुरु भएको हो ।

कार्यवाहक महामन्त्री कवीन्द्र बुर्लाकोटीका अनुसार बैठकको सुरुमा समसामयिक राजनीतिक विषयमा छलफल र रिपोर्टिङ भएको छ । रास्वपाले केन्द्रीय समिति र आमन्त्रित सदस्यहरू माझ स्थानीय तह उपनिर्वाचनको समीक्षा गरिरहेको छ । 

रास्वपाले संगठनको समीक्षा र संगठन रणनीतिका विषयलाई छलफलको एजेन्डा बनाएको छ । संगठन सबलीकरण र जागरण अभियान, लिडरसिप एकेडेमी, क्यान्डिडेट क्लब र ब्लु प्रिन्ट फ्रेमवर्क तथा प्रदेश समन्वय संयन्त्रका सबन्धमा पनि छलफल गरिने रास्वपाले जनाएको छ ।

पहिलो दिनको यस सेसनमा केन्द्रीय समिति सदस्य, आमन्त्रित सदस्यहरूमा केन्द्रीय संगठन विभाग, प्रशिक्षण विभाग एवं प्रदेशका महामन्त्रीहरू सहभागी छन् ।

रास्वपाले केन्द्रीय समिति सदस्यहरू मात्रै रहने बैठकमा सहकारी सम्बन्धी अध्यादेश २०८१, संसदमा दर्ता भएका विधेयक र पार्टीको धारणा सम्बन्धी छलफल, पार्टी संरचना सम्बन्धमा प्रारम्भिक छलफल गरेर पहिलो दिनको बैठकको समीक्षा र दोस्रो दिनको छलफलको तयारी गरिने बुर्लाकोटीले जानकारी दिए ।