काठमाडौं – आगामी शुक्रबार अर्थात् मंसिर १८ बाट प्रदर्शनमा आउन लागेको फिल्म ‘अभिमन्यु : च्याप्टर १’को अग्रिम टिकट बुकिङ खुलेको छ ।

हलहरुले मंगलबारबाटै अग्रिम टिकट बुकिङ खुलाएका हुन् । देशकै ठूलो मल्टिप्लेक्स चेन क्यूएफएक्स र दोस्रो ठूलो चेन आईएनआई यो फिल्मलाई शुक्रबारका लागि समान ११–११ शो छुट्याएका छन् ।

शुक्रबारसम्म यी चेनका हलहरुले थप शो बढाउने सम्भावनमा देखिन्छ । वान सिनेमाज र विग मुभिज अन्तर्गतका हलहरुले पनि टिकट बुकिङ खुलाएका छन् ।

विभिन्न कारणले चार पटक प्रदर्शन मिति फेरिएको यो फिल्म अब भने प्रदर्शनमा आउने पक्का भएको छ ।

गत सोमबार यस फिल्मको प्रिमियर आयोजना गरिएको थियो । प्रिमियरमा उपस्थितहरुले यो फिल्मलाई मन पराएका थिए ।

यस फिल्ममा नायक कामेश्वर चौरासिया, नायिकाहरु लक्ष्मी बर्देवा, सरिता गिरी र गौमाया गुरुङ शीर्ष भूमिकामा रहेका छन् ।

मुकेश खनालले लेखेको यो फिल्मको निर्देशक सुशान्त गौतम हुन् । निर्माताहरु विनोद पौडेल र गुञ्जन गिरी हुन् ।

पौडेल नेपाली फिल्म इतिहासकै सर्वाधिक व्यापार गर्ने ‘पूर्णबहादुरको सारङ्गी’का निर्माता मध्ये एक हुन् । यो फिल्म नेपाली र हिन्दी दुवै भाषामा प्रदर्शनमा आउने निर्माण पक्षले बताएको छ ।