काठमाडौँ- नेकपा (माओवादीकेन्द्र) को मधेश प्रदेशसभाको संसदीय दलको नेतामा पुनः भरतप्रसाद साह नियुक्त भएका छन्। माओवादी केन्द्रका संयोजक पुष्पकमल दाहाल (प्रचण्ड) ले मधेश प्रदेश सरकारका पूर्वअर्थ र गृहमन्त्रीसमेत रहेका साहलाई आज मधेश प्रदेश संसदीय दलको नेता नियुक्त गरेका हुन्।

मधेश प्रदेशसभाका सभामुख रामचन्द्र मण्डललाई पत्र लेख्दै प्रचण्डले साहलाई पार्टीको तर्फबाट मधेश प्रदेश संसदीय दलको नेतामा पुनर्स्थापित गर्ने निर्णय भएको पत्रसमेत पठाएका छन्।

प्रचण्डले सभामुख मण्डलको सचिवालयलाई पठाएको पत्रमा भनिएको छ, ‘नेपाल कम्युनिस्ट पार्टी (माओवादी केन्द्र) मधेश प्रदेश संसदीय दलको नेतामा माननीय भरतप्रसाद शाहलाई पुनर्स्थापित गर्ने निर्णय भएकाले उहाँलाई दलनेता कायम गरी दलको तर्फबाट प्रतिनिधित्व गराउनुहुन अनुरोध छ।’

करिब ६ महिनाअघि बहुमत सांसदले नेता साहविरुद्ध पार्टीको केन्द्रीय कार्यालयमा डेलिगेसन गएपछि तत्कालीन समयमा प्रचण्डले साहलाई दलको नेताबाट राजीनामा दिन लगाएका थिए।