काठमाडौं– बेरोजगार युवायुवतीलाई आकर्षक तलबको प्रलोभनमा पारी रोजगारीका लागि विभिन्न देशमा लैजाने भन्दै लामो समयसम्म झुक्क्याएर नपठाएको आरोपमा दुई जना पक्राउ परेका छन् । 

पक्राउ पर्नेमा रौतहट घर भएकी २७ वर्षीय सिर्जना कार्की र भक्तपुर घर भएका ३५ वर्षीय सरोज सुवाल रहेका छन् ।

पक्राउ परेका मध्ये कार्कीले एक जना पीडितलाई रोमानिया पठाउने भन्दै चार लाख रुपैयाँ लिएको र सुवालले पनि अर्का एक पीडितबाट सर्विया पठाउने भन्दै तीन लाख रुपैयाँ लिएर सम्पर्कविहीन भएको आरोपमा उनीहरूलाई काठमाडौं उपत्यका अपराध अनुसन्धान कार्यालयबाट खटेको प्रहरी टोलीले पक्राउ गरेको हो । 

उनीहरूलाई थप अनुसन्धान तथा कारबाहीको लागि वैदेशिक रोजगार विभाग ताहाचल पठाइएको प्रहरीले जनाएको छ ।