काठमाडौं– एउटा यात्रुबस मुग्लिङ-पाेखरा सडकखण्डकाे ऐना पहराबाट खसेको छ। दुर्घटनामा २ जना यात्रु गम्भीर घाइते भएका छन् । अन्य तीनजना सामान्य घाइते छन् ।

गोरखाबाट चितवनको नारायणगढ गइरहेको ग२ख१०७७ नम्बरको बस सडकबाट मर्स्याङ्दी नजिकै भीरमा खसेको तनहुँ प्रहरीले जनाएको छ ।

केही बेरअघि आँबुखैरेनी नजिकै दुर्घटना भएको बस भीरमा गएर अड्किएको छ। बस केही मिटरले मर्स्याङ्दीमा खस्नबाट जोगिएको छ।

प्रहरीका अनुसार उक्त बस सडकबाट अनियन्त्रि भएर कम्तीमा पनि ५० मिटर तल खसेको छ। प्रहरीले अहिले चालकलाई नियन्त्रणमा लिइसकेको छ ।

बसको अगाडिको भाग दबिएकाले त्यहाँ थप यात्रु अड्किएको हुन सक्ने प्रहरीले अनुमान गरेको छ । उक्त बस निकाल्न प्रहरीले क्रेन झिकाएको छ। क्रेनले बस तानेपछि कति यात्रु बसभित्र थिए भन्ने खुल्ने प्रहरी बिट आँबुखैरेनीले उल्लेख गरेको छ।

यस स्थानबाट पहिले पनि बस दुर्घटना हुने गरेको थियो ।