काठमाडौँ – भ्रष्टाचार मुद्दा अभियोजन क्रममा अदालतमा पेश गरिएका सरकारी साक्षीले बयान फेरेपछि निजविरुद्ध पनि भ्रष्टाचार मुद्दा लागेको छ ।

अख्तियार दुरुपयोग अनुसन्धान आयोगले बाँकेको कोहलपुर नगरपालिकाका डम्मरबहादुर बुढाथोकीविरुद्ध विशेष अदालतमा कैद सजाय मागसहित भ्रष्टाचार मुद्दा दायर गरेको हो ।

बुढाथोकीले नियमानुसार जग्गाको मोठ भिडाउन सहजीकरण गरीदिन भन्दै मिलेमतोमा प्रतिवादीहरू शान्ति पुन (बिचौलिया), खरिदारद्वय रतन बहादुर जि.सी., हरिचन्द्र पाण्डे तथा घनश्याम तिवारीलाई २० हजार रुपैयाँ नगद घुस/रिसवत दिएका थिए ।

उक्त भ्रष्टाचार मामिलामा विशेष अदातल, काठमाडौँमा दर्ता भएको मुद्दामा आयोगले बुढाथोकीलाई सरकारी साक्षीको रूपमा पेश गरेको थियो । तर, बुढाथोकीले विशेष अदालतमा अनुसन्धान अधिकृत समक्ष गरेको बयान प्रतिकूल हुने गरी बकपत्र गरेका थिए ।

बुढाथोकीले कार्य कसुर गरेको पुष्टि भएको र निजको उक्त कार्य भ्रष्टाचार निवारण ऐन, २०५९ को दफा घ को उपदफा ९३० बमोजिमको कसूर भएको आयोगले जनाएको छ ।

बुढाथोकीविरुद्ध २० हजार रुपैयाँ बिगो कायम गरी कैद सजाय र घुस/रिसवत जफत गर्न मागदावी लिइ विशेष अदालतमा आरोपपत्र दायर गरिएको आयोगका प्रवक्ता राजेन्द्रकुमार पौडेलले जानकारी दिएका छन्‌ ।