काठमाडौं– नेपाली कांग्रेसका नेता अर्जुनरसिंह केसीले पार्टीको १५ औँ महाधिवेशन ०८२ मंसिर भित्रै सम्पन्न हुनुपर्ने बताएका छन् । कांग्रेस केन्द्रीय कार्यसमितिको बिहीबारको बैठकमा धारणा राख्ने क्रममा उनले महाधिवेशनको निश्चित तिथि जारी बैठकबाटै तोकिनु पर्ने बताए ।    

‘०८२ मंसिरभित्रै महाधिवेशन सम्पन्न होस्,’ केन्द्रीय सदस्य केसीले भने, ‘त्यसको निश्चित तिथि यही बैठकबाट तोकिनु अनिवार्य भएको छ ।’ 

सभापति शेरबहादुर देउवाले महाधिवेशन समयमै हुने सार्वजनिक अभिव्यक्ति दिने गरेको स्मरण गर्दै उनले समयमै भनिएको समय कहिले हो भन्दै प्रश्न गरे । 

‘बारम्बार केन्द्रीय कार्यसमिति तथा सार्वजनिक रूपबाट समयमै महाधिवेशन हुने अभिव्यक्ति सभापतिजीले दिँदै आउनु भएको छ । त्यो भनिएको समय कहिले हो ?,’ केसीले प्रश्न गरे, ‘त्यो समय ०८२ मंसिर भित्र हो कि ०८३ मंसिर हो ? वा देशको संविधानले दिएको ६ महिना र विशेष परिस्थिति पनि कुर्ने हो ?’ 

केसीले निर्वाचनपछि महाधिवेशन गर्ने कुरासमेत उठ्ने गरेको भन्दै उक्त विषय संविधान र कानुनी रूपबाट सम्भव नै नभएको जिकिर गरे । 

‘कहिलेकहीँ निर्वाचनपछि महाधिवेशन गर्ने कुरा पनि उठ्छ । त्यो त संविधान र कानुनी रूपबाट सम्भवै छैन,’ केसीले भने, ‘यस्तो गर्दा पार्टीको वैधानिकतामाथि नै संकट आइपर्ने हेक्का राख्नु पर्ने जरुरी छ ।’