काठमाडौं – बलिउड नायिका रानी मुखर्जीले अर्की नायिका ऐश्वर्यासँग सम्बन्ध चिसिएको बारेमा बालेकी छन् ।

रानीले ऐश्वर्यालाई कुनै समयको प्रतिस्पर्धीका रुपमा गनेपछि उनीहरुको चिसो सम्बन्धले फेरि एक पटक चर्चामा पाएको हो ।

यसअघि दुवैले आफूहरुबीच सबै कुरा सामान्य रहेको बताउँदै आएका थिए । अहिले भने रानीले सम्बन्ध निकैअघि देखि बिग्रिएको खुलाएकी हुन् ।

‘कफी विथ करण’ शोमाका प्रस्तोता करण जोहोरले नियतबस रानीसँग ऐश्वर्याको कुरा कोट्याउँछन् ।

रानीले ऐश्वर्यासँग सम्बन्ध सामान्य रहेको बताउँछिन् । र करणलाई भन्छिन्, ‘यसको कारण तपाईंलाई थाहा छ ।’

करण यतिमै रोकिँदैनन् । उनले रानीबाट थप कुरा फुत्काउन नियतले अघि बढ्छन् र भन्छन्, ‘चलते चलते बता दो ।’

करणको यो आग्रह मात्रै थिएन । यहाँ व्यङ्ग्य पनि मिसिएको थियो । किनभने रानी र ऐश्वर्याको सम्बन्ध फिल्म ‘चल्ते चल्ते’कै कारण बिग्रिएको गसिप छ।

त्यसपछि रानीले भित्रि कुरा खुलाइन् । अगाडि भनिन्, ‘मेरो ऐश (ऐश्वर्या)सँग व्यक्तिगत समस्या छैन । तर, सायद ऐशलाई छ होला । किनभने उनले आजभोलि मलाई फोन गर्न छोडिन् । मैले उसलाई सार्वजनिक कार्यक्रममा पनि भेटेको छैन । भेट भयो पनि सभ्य व्यवाहार नै हुनेछ ।’

ऐश्वर्या र रानीबीच के भएको थियो ?

ऐश्वर्या र रानी एकै समय चर्चामा रहेका नायिका हुन् । यी दुवैको प्राइम टाइमसँगै आएको थियो । त्यस समय उनीहरु मिडियामा मिल्ने साथीका रुपमा प्रस्तुत हुन्थे।

त्यसबेला रानी अहिले ऐश्वर्याका श्रीमान् अभिषेक बच्चनसँग प्रेम सम्बन्धमा थिइन् । यता, ऐश्वर्या सलमान खानसँग प्रेम सम्बन्धमा थिइन् ।

फिल्म ‘चल्ते चल्ते’ छायाङ्कनका दौराना सलमान र ऐश्वर्याको सम्बन्धमा दरार आएको थियो ।

सलमानले छायाङ्कनस्थलमा लफडा गर्न थालेपछि ऐश्वर्यालाई फिल्मबाट निकालियो । ऐश्वर्यालाई निकाल्ने निर्णय फिल्मको निर्मातासमेत रहेका नायक शाहरुख खानको थियो भन्ने गसिप छ ।

फिल्ममा ऐश्वर्याको स्थानमा रानीको प्रवेश भयो । त्यही बेलादेखि यी दुईको सम्बन्ध बिग्रिएको गसिप सुरु भएको हो।

अर्थात्, आफूलाई निकालिएको फिल्ममा रानीको प्रवेश ऐश्वर्यालाई चित्त बुझेन । रानीले आफूलाई प्रतिस्पर्धीका रुपमा लिएको उनको बुझाइ बन्यो ।

यता अभिषेक र रानीको प्रेम पनि विवाहसम्म पुग्न सकेन । आमा जया बच्चनले रानीलाई बुहारीको रुपमा अस्वीकार गर्ने भएपछि अभिषेकी उनलाई छोडेको चर्चा हुने गर्छ ।

त्यसपछि ऐश्वर्याले अभिषेकसँग विवाह गरिन् । उक्त विवाहमा रानीलाई निम्तो थिएन ।

ऐश्वर्यालाई रानीले फिल्म खोसेको भन्ने भयो । उता रानीलाई ऐश्वर्याले आफ्नो प्रेमी खोसेको भन्ने महसुस भयो । यिनै दुई कारण यी दुईको सम्बन्ध बिग्रिएको गसिप बनेको हो ।

त्यसपछि उनीहरुलाई पहिला जस्तो निकट देखिन छाडेपछि यो गसिपले थप बढवा पाएको हो । अहिले रानीको करणसँगको अन्तर्वार्ताले पनि गो गसिपलाई बढवा दिएको छ ।