काठमाडौं– सांसदहरूले सार्वजनिक यातायात सञ्चालन गरेर जिम्मेवार बन्न यातायात व्यवसायीहरूलाई आग्रह गरेका छन् ।  

सरकारसँग सहमति भइसकेको अवस्थामा आन्दोलनका कार्यक्रम फिर्ता लिई यातायात सञ्चालन गरेर जिम्मेवार बन्न सांसदहरूले यातायात व्यवसायीहरूलाई आग्रह गरेका हुन् ।

मंगलबार संसद भवन नयाँ बानेश्वरमा सञ्चारकर्मीसँग कुरा गर्दै कांग्रेस सांसद जीवन परियारले सरकारसँग समझदारी भइसकेपछि यातायात नचल्नु दुर्भाग्यपूर्ण कुरा भएको बताए ।

समझदारी कार्यान्वयन नभए पुन आन्दोलन गर्ने छुट यातायात व्यवसायीलाई रहँदा जनतालाई दुख दिने गरी यातायात बन्द गर्नु गलत भएको उनले बताए ।

उनले सार्वजनिक यातायात नेपालभित्रको कानून अनुसार चल्नुपर्ने भएकाले विमतिहरूलाई सच्चाउनेतर्फ सहमति भएकाले व्यवसायीले सहमति कार्यान्वयन गर्नुपर्ने धारणा राखे ।  

त्यस्तै नेकपा एकीकृत समाजवादीका सांसद राजेन्द्र पाण्डेले राइड सेयरिङले जनतालाई सुविधा नै दिएको भए पनि नयाँ कानून बनाउँदा सरकारले पनि सरोकारवालाहरुसँग छलफल गर्नुपर्नेमा जोड दिए । उनले सरकारले यस विषयमा छिटो निकास निकाल्दै सर्वसाधारणलाई सेवा दिनुपर्ने धारणा राखे ।

गण्डकी प्रदेश सरकारले नियमावली स्थगन गरेपछि मात्रै आफूहरूका आन्दोलन फिर्ता हुने यातायात व्यवसायीको अडानका कारण मंगलबार पनि देशभर सार्वजनिक यातायात बन्द छन् ।