लुम्बिनी – नेपाली कांग्रेसका केन्द्रीय सदस्य बालकृष्ण खाँणले नेपालमा विदेशी विद्यार्थीलाई छात्रवृत्ति प्रदान गरेर आकर्षित गर्नुपर्ने आवश्यकता औँल्याएका छन् ।

आज बुटवलस्थित सिद्धार्थ गौतमबुद्ध क्याम्पसको क्याम्पससभा (अधिवेशन)को उद्घाटन गर्दै क्याम्पस व्यवस्थापन समितिका संस्थापक अध्यक्षसमेत रहनुभएका पूर्वगृहमन्त्री खाँणले शिक्षा, सीप र रोजगारीलाई आपसमा जोड्ने नीति बनाउन सरकारलाई आग्रह गरे ।

उनले स्वदेशमा पढ्दै कमाउने वातावरण बनाउनुपर्ने भन्दै विदेशमा पढ्दै कमाउने अवसरका कारण विदेशी शिक्षामा विद्यार्थीको आकर्षण बढेको बताए ।

उनले नेपालका विश्वविद्यालय तथा क्याम्पसहरूले गुणस्तरीय शिक्षा प्रदान गर्न सके विदेशी विद्यार्थीको आकर्षण बढ्ने विश्वास व्यक्त गरे । उनले भने, “नेपालमा पनि विदेशको जस्तै नीति लागू गरी विदेशी विश्वविद्यालय जस्तै यहाँ विदेशी विद्यार्थीलाई आकर्षित गर्न सकिन्छ । त्यसका लागि छात्रवृत्तिको व्यवस्था गर्न सकिन्छ ।”

उनले सूचना प्रविधि, पर्यटन, अनुसन्धान, उद्यमशीलता तथा रोजगारीलगायत क्षेत्रलाई शिक्षासँग एकीकृत गराउनुपर्ने सुझाव दिए ।