काठमाडौं– भारत प्रशासित जम्मु कश्मीरको पहलगाम क्षेत्रमा भएको आतंककारी आक्रमणमा एक जना नेपालीसहित २७ जना पर्यटकले ज्यान गुमाए । पहलगाम आक्रमणसँगै कश्मीरमा पर्यटकको चहलपहल उल्लेख्य रुपमा घटेको छ ।

तैपनि केही पर्यटक भने सुरक्षा संवेदनशीलताका बावजुद अझै पनि कश्मीर भ्रमणमा गइरहेका छन् । अहिले पनि कतिपय पर्यटक कश्मीर भ्रमणमा गइरहेको भारतीय सञ्चार माध्यमले जनाएका छन् ।

भारतीय समाचार संस्था एएनआईसँगको कुराकानीमा कश्मीरस्थित श्री गौरीशंकर मन्दिर भ्रमणमा गएकी पर्यटक मिठु मौलिकले कश्मीरको सुन्दरताबाट आफू प्रभावित भएको बताएकी छिन् । घुम्न आउनुअघि आफूलाई डर लागेको भएपनि आइसकेपछि भने आफूले राम्रो समय व्यतित गरिरहेको उनले उल्लेख गरेकी छिन् ।

अहमदावादबाट पहलगाम घुम्न गएका केवल पटेलले पनि ‘मिनी स्विट्जरल्याण्ड’ घुम्न पाउँदा आफूलाई खुशी लागेको प्रतिक्रिया दिएका छन् । आक्रमणपछि सुरक्षा व्यवस्था अझ कडा भएकाले आफूलाई कुनै डर नलागेको उनले एएनआईलाई बताएका छन् ।

पश्चिम बंगालबाट पहलगाम पुगेकी अर्की पर्यटक मौमिता साहले पनि पहलगाम घुम्दा आफूलाई आनन्द लागिरहेको प्रतिक्रिया दिएकी छिन् । उनले भनिन्, ‘यहाँ पूरा सुरक्षा छ, सैनिकहरु तैनाथ छन् । तरपनि केही ठाउँ भने बन्द रहेछन् । यहाँ कुनै हिंसा छैन ।’