काठमाडौं– कार्यवाहक प्रधानमन्त्री प्रकाशमान सिंहले बढ्दो वायु प्रदूषण कम गर्न सबैले भूमिका खेल्नुपर्ने बताएका छन् । 

सहरी विकास मन्त्रालयमा बिहीबार विज्ञसँगको छलफलमा उनले वायु प्रदूषणका कारण जनजीवन प्रभावित हुँदै गएपछि सबैलाई सघाउन आग्रह गरेका हुन् । 

कार्यवाहक प्रधानमन्त्री सिंहले अहिले प्रदूषण बढ्नुको मुख्य कारण डढेलो रहेको जानकारी दिए । उनले छिट्टै सरकारले यस विषयमा निर्णय लिने पनि बताए । 

छलफलमा वन मन्त्रालयले प्रदूषण बढ्दै गएकाले हप्ताको दुई दिन बिदा दिनुपर्ने, सवारी जोर–बिजोर गरेर चलाउनु पर्नेसम्मको स्थिति हुन सक्ने संकेत गरेको छ । वन मन्त्रालयका सचिव दीपक खरालले यस्तो बताएको सिंहको सचिवालयले जनाएको छ । 

छलफलमा विज्ञहरूले प्रदूषणको प्रमुख कारण सवारी साधन रहेको दाबी गर्दै केही दिन चाप कम गर्नुपर्ने सुझाव पनि एका छन् । वातावरण विज्ञ भूषण तुलाधरले वायु गुणस्तर योजना बनाउनुपर्नेमा जोड दिए । डढेलो विज्ञ सुन्दर शर्माले वातावरण संरक्षणका लागि राष्ट्रिय रणनीति बनाउनु पर्ने सुझाव दिनु दिए  ।

निर्माण व्यवसायी महासंघका अध्यक्ष रवि सिंहले भने सरकारले निर्माण व्यवसायीलाई मात्र दोष दिएर पन्छिन नमिल्ने बताए । 

राष्ट्रिय यातायात व्यवसायी महासंघले सार्वजनिक सवारी साधनले नभएर झन्डै दुई लाख निजी मोटरसाइकलले बढी प्रदूषण गरेको भन्दै सार्वजनिक सवारी साधनलाई प्राथमिकता दिनुपर्नेमा जोड दियो । 

छलफलमा वनमन्त्री ऐनबहादुर शाही, वनराज्यमन्त्री रुपा विकलगायतका मन्त्रालय र विभागका कर्मचारीको उपस्थित रहेको थियो ।