काठमाडौं– वन तथा वातावरण मन्त्रालयले काठमाडौं उपत्यकाको प्रदूषण नियन्त्रणका लागि सातामा दुई दिन सार्वजनिक बिदा दिन सुझाव दिएको छ । सहरी विकास मन्त्रालयमा बिहीबार भएको छलफलमा वन मन्त्रालयले प्रदूषण नियन्त्रणका लागि सातामा दुई दिन सार्वजनिक बिदा दिन सुझाव दिएको हो ।

कार्यवाहक प्रधानमन्त्री प्रकाशमान सिंहले उपत्यकामा बढिरहेको प्रदूषण नियन्त्रण र असर न्यूनीकरणका लागि सरोकारवाला र विज्ञहरूसँग छलफल गरेका थिए । 

छलफलका क्रममा वन मन्त्रालयका सचिव दीपक खरालले उपत्यकाको प्रदूषण नियन्त्रणका लागि सातामा दुई दिन सार्वजनिक बिदा दिन सुझाव दिएको कार्यवाहक प्रधानमन्त्री सिंहको सचिवालयले जनाएको छ । 

छलफलका क्रममा विज्ञहरूले प्रदूषण कम नहुँदासम्म सवारी साधनहरू बारअनुसार जोर–बिजोर गरेर चलाउनुपर्ने पनि सुझाव दिएका छन् । छलफलमा सडक र अन्य आयोजना निर्माण गर्दा अनिवार्य रूपमा प्रदूषणसम्बन्धी शुल्क तिर्ने व्यवस्था गरिनुपर्नेमा पनि जोड दिएका छन् ।