काठमाडौं– राजसंस्थाको वकालत गर्दै आएको राष्ट्रिय प्रजातन्त्र पार्टी (राप्रपा)ले चैत १५ गते तीनकुनेमा भएको घटनाका छानबिनका लागि स्वतन्त्र छानबिन आयोग गठनको माग गरेको छ । 

कार्यवाहक प्रधानमन्त्री प्रकाशमान सिंहलाई बिहीबार ध्यानाकर्षण पत्र बुझाएर राप्रपाले राजावादीले चैत १५ गते तीनकुने क्षेत्रमा गरेको प्रदर्शनका क्रममा भएको हिंसात्मक घटनाको छानबिनका लागि आयोग गठनको माग गरेको हो । 

राप्रपाको ध्यानाकर्षण पत्रमा उक्त घटना छानबिनका लागि सर्वोच्च अदालतका पूर्वन्यायाधीशको अध्यक्षतामा मानव अधिकार आयोग र नागरिक समाज सम्मिलित स्वतन्त्र छानबिन आयोग गठन गरिनुपर्ने भनिएको छ ।  

राप्रपाले छानबिनका लागि गृहमन्त्री रमेश लेखकले राजीनामा दिनुपर्ने र चैत्र १५ गतेको दमनमा नेतृत्व गर्ने प्रहरी प्रमुख र प्रशासनिक नेतृत्वलाई निलम्बन गरिनुपर्ने पनि माग गरेको छ ।  

राप्रपाले मृतक सबिन महर्जन र पत्रकार सुरेश रजकलाई सहिद घोषणा गरेर क्षतिपूर्तिको व्यवस्था गर्नुका साथ सरकारले राप्रपा नेताहरू रवीन्द्र मिश्र र डा. धवलसम्शेर राणालगायत अन्यमाथिको झुठा मुद्दा खारेज र निर्दोषहरूलाई रिहाइ गर्नुपर्ने र घाइतेहरूको निःशुल्क र प्रभावकारी उपचारको व्यवस्था गरिनुपर्ने पनि माग गरेको छ ।