काठमाडौं- काठमाडौं उपत्यकामा केही दिनदेखि वायु प्रदूषण उच्च रहेको छ । वायु गुणस्तर मापन गर्ने स्वीस कम्पनी आइक्यू एअरले गरेको मापनअनुसार अहिले काठमाडौं उपत्यका विश्वको दोस्रो प्रदूषित शहरमा रहेको छ ।

अहिले काठमाडौं उपत्यकाको औसत वायु गुणस्तर सूचक (एक्यूआई) ३७५ रहेको छ । जसलाई खतरनाक अवस्था मानिन्छ ।

विश्वका प्रदूषित शहरमध्ये पहिलो नम्बरमा रहेको इराकको बग्दादमा एक्यूआई ६४७ रहेको छ । नेपालपछि रहेको दिल्लीको एक्यूआई १९९ छ ।

मौसमविद् बिनु महर्जनले विगत केही दिनदेखि वायु प्रदूषणका कारण काठमाडौं उपत्यकामा डम्म लागेको बादल फाट्न अझै केही दिन लाग्ने बताइन् ।

शुक्रबारदेखि वायुको वेग आजको तुलनामा अधिक हुने सम्भावना रहेकाले क्रमशः सुधार भई आकाश खुल्दै जाने उनको भनाइ छ । 

उनका अनुसार हाल काठमाडौं उपत्यकामा वर्षा हुने अवस्था नरहेको तर क्रमशः यहाँको आकाशबाट बादल हट्ने लक्षण देखिएको छ । 

उनले बुधबारको तुलनामा आज तापक्रम पनि केही घटेको उल्लेख गर्दै भोलिदेखि क्रमशः तापक्रम पनि बढ्ने जानकारी दिइन् ।