काठमाडौं- नागरिक उन्मुक्ति पार्टीका संरक्षक रेशम चौधरीको पहलमा तराई-मधेसकेन्द्रित दलले नयाँ मोर्चाबन्दीका लागि छलफल थालेका छन् ।

नागरिक उन्मुक्ति पार्टी संसदीय दलको कार्यालय सिंहदरबारमा सोमबार तराई-मधेसकेन्द्रित ८ दलबीच यसबारे छलफल भइरहेको छ ।

‘मधेश तथा थारु आन्दोलनबाट प्राप्त उपलब्धिको रक्षाका लागि आगामी दिनको रणनीति बनाएर जाने कुरा हुँदैछ । समान विचारवाहक आठ दलीय मोर्चाको काम कर्तव्य र अधिकारसहित भावी योजनासम्बन्धी महत्त्वपूर्ण छलफलका लागि आठ दलबाट कार्यदलका सदस्य र वार्ता टोली संयोजक बसिरहेका छौँ,’ सदस्य केशव झाले भने ।

उनका अनुसार जसपाबाट रेणु यादव र इस्तियाक राई , जनमत पार्टीका अब्दुल खान र शरद सिंह यादव, जनता समाजवादी पार्टी नेपालबाट राजकिशोर यादव र मनिष सुमन, नागरिक उन्मुक्ति पार्टीबाट गंगाराम चौधरी र लालवीर चौधरी, लोकतान्त्रिक समाजवादी पार्टीबाट सर्वेन्द्रनाथ शुक्ला र लक्ष्मणलाल कर्ण, राष्ट्रिय मुक्ति पार्टीबाट रामनरेश राय र केशव झा, जनता प्रगतिशील पार्टीबाट शिवजी यादव, तमलोपाबाट वृषेशचन्द्र लाल र ब्रजकिशोर सिंह छन् ।