काठमाडौं– पाकिस्तानमा ईश्वरको निन्दा गरेको आरोपमा एक जना युवा पक्राउ परेका छन् । पाकिस्तानको शाहिवाल क्षेत्रमा ईश्वरको निन्दा गरेको आरोपमा इसाई युवा पक्राउ परेका हुन् ।

पाकिस्तानबाट प्रकाशित हुने डन अखबारका अनुसार उनले केही मानिसहरूको सामुन्ने ईश्वरको निन्दा हुने शब्द प्रयोग गरेका थिए । उक्त घटनापछि स्थानीय धार्मिक नेताहरूले नजिकैको प्रहरी चौकीमा उजुरी दिएका थिए ।

आरोपी व्यक्ति लागूऔषध दुर्व्यसनी र मानसिक रुपमा अस्थिर रहेको हुनसक्ने प्रहरीको आशङ्का छ । उनीविरुद्ध पाकिस्तान अपराध संहिताको २९५–ए र २९८–ए तथा प्रतिआतङ्कवाद कानुन १९९७ को धारा ७ अनुसार कारवाही प्रक्रिया अघि बढाइएको प्रहरीको भनाइ छ ।

स्थानीय इसाई धर्मगुरुहरूले घटनाप्रति दुःख व्यक्त गर्दै आरोपीको स्वास्थ्य परीक्षण गर्न माग गरेका छन् । डनका अनुसार पछिल्ला १५ महिनामा शाहिवाल क्षेत्रमा ईश निन्दाका एक दर्जनभन्दा धेरै उजुरी परेको छ ।