काठमाडौं- पूर्वराष्ट्रपति विद्यादेवी भण्डारीले अराजकता, विकृति र विसंगतिलाई रोक्न प्रगतिशील कला संस्कृतिको महत्वपूर्ण भूमिका हुने बताएकी छन्।

शुक्रबार काठमाडौंमा नेकपा एमालेका वरिष्ठ उपाध्यक्ष ईश्वर पोखरेलको संस्मरण ‘आमा, सपना र ताराहरू’ लोकार्पण गर्दै भण्डारीले यस्तो बताएकी हुन् ।

सर्जकहरूले आफ्ना सिर्जनामार्फत देश र जनताको सेवामा थप समय खर्चिनुपर्ने खाँचो देखिएको उनले बताइन् ।

भण्डारीले नेपाली राजनीतिक परिवर्तनमा पोखरेलले खेलेको भूमिकाको प्रसंसा गरिन् । त्यस्तै उनले पार्टी वा राजकीय जुनसुकै भूमिकामा भए पनि आफ्नो जिम्मेवारी प्रभावकारी रुपमा निर्वाह गर्नुपर्ने मान्यता पोखरेलमा रहेको बताइन् ।

कार्यक्रममा कांग्रेस महामन्त्री विश्वप्रकाश शर्माले समाजलाई सही रुपमा अघि बढाउन आमाहरूको भूमिका महत्वपूर्ण रहेको बताए ।

उनले देशलाई सामाजिक अभिभावक आवश्यक परेकोले राजनीतिभन्दा पर बसेर परिवर्तनको नायक बन्न पूर्वराष्ट्रपति विद्यादेवी भण्डारीलाई सुझाव दिए ।

राजनीतिमा आएर कसैको मात्रै बन्ने पनि सुविधा रहे पनि राजनीतिभन्दा पर सामाजिक परिवर्तनको नायक बनेर सबैको बन्ने अवसर पनि रहेको उनले बताए ।

त्यस्तै पुस्तकका लेखक एमाले वरिष्ठ उपाध्यक्ष पोखरेलले आमाहरूको नायकत्व स्थापीत गर्न आफूहरूको तर्फबाट राजनीतिक हिसाबले कुनै कमी हुन नदिने प्रतिबद्धता जनाए ।