काठमाडौं- नेपाली कांग्रेसका महामन्त्री विश्वप्रकाश शर्माले पूर्वराष्ट्रपति विद्यादेवी भण्डारीलाई सक्रिय राजनीतिमा नफर्किन सुझाव दिएका छन् ।

एमालेका वरिष्ठ उपाध्यक्ष ईश्वर पोखरेलद्वारा लिखित ‘आमा,सपना र ताराहरू’ कृति विमोचन कार्यक्रममा शुक्रबार बोल्दै शर्माले भण्डारी अब राजनीतिमा आउनुभन्दा सामाजिक रुपान्तरणको नायक बन्नुपर्ने सुझाए ।

‘पूर्वराष्ट्रपति विद्यादेवी भण्डारीले सामाजिक रुपान्तरणको प्रेरणाका रूपमा काम गर्नुपर्दछ,’ शर्माले भने ‘यद्यपि राजनीतिमै आउन चाहनुभएको हो कि, नेताहरूले ल्याउन खोज्नुभएको हो ? यदि मलाई कसैले सोध्छ भने दुवै पूर्वराष्ट्रपति (विद्यादेवी भण्डारी र डा. रामवरण यादव) हरू सामाजिक रुपान्तरणको नायक बन्नुपर्छ भन्ने मान्यता राख्दछु ।’

एमालेकी तत्कालीन उपाध्यक्ष भण्डारी दुई कार्यकाल राष्ट्रपति बनेर बाहिरिएपछि फेरि सक्रिय रानीतिमा फर्किने तयारीमा छिन्। यसबारे उनले र एमाले दुवैले मुख खोलेका छैनन् ।

अध्यक्ष केपी शर्मा ओली अहिले नै उनलाई राजनीतिमा ल्याउने पक्षमा देखिएका छैनन् । तर एमालेका वरिष्ठ उपाध्यक्ष पोखरेलसहितका नेताहरू भण्डारीलाई राजनीतिमा ल्याउने कोसिस गरिरहेका छन् ।

भण्डारीलाई राजनीतिमा ल्याउने कोसिसमा एमाले उपाध्यष्क्ष विष्णु पौडेल तथा नेताहरू गोकुल बास्कोटा र कर्ण थापा पनि लागिरहेका छन् । एमालेको एउटा पंक्ति भण्डारीलाई राजनीतिमा ल्याउन लागिरहेपछि बिहीबार मात्रै अध्यक्ष ओलीले बूढानीलकण्ठ पुगेर दुई घण्टा लामो छलफल गरेका छन् ।

यसअघि गत मंसिर ३० गते च्यासलमा भएको राष्ट्रिय कार्यशाला भेलामा ओ‌लीले भण्डारीलाई एमालेले राष्ट्रपति बनाएको बताउँदै चाहेमा अब उनलाई एमालेले नै राजनीतिमा सक्रिय गराउने बताएका थिए ।