रसुवा– पाँच दिनदेखिको लगातार वर्षाका कारण अवरुद्ध स्याफ्रुबेँसी–रसुवागढी खण्डको अन्तर्राष्ट्रिय राजमार्ग पुनः सञ्चालनका लागि मर्मत सुरु भएको छ ।
        
भारी वर्षाका कारण सडकका दर्जनौँ स्थानमा क्षति भई यातायात सञ्चालनमा अवरुद्ध भएको थियो । सडक विभागकै स्वामित्वमा रहेको डोजरको सहायताले अन्तर्राष्ट्रिय राजमार्गको मर्मत सुरु गरिएको गल्छी, त्रिशूली, मैलुङ स्याफ्रुबेँसी, रसुवागढी सडक सुधार आयोजनाका प्रमुख कृष्णनाथ ओझाले जानकारी दिए । 

उनका अनुसार पाँच दिनमा मर्मत सम्पन्न गर्ने लक्ष्यका साथ यही कात्तिक १५ गतेदेखि डोजर परिचालन गरिएको हो । 

गत असार र साउनको वर्षाले क्षति बनाई पुनः सञ्चालनमा ल्याएपश्चात् कात्तिकको वर्षाका कारण सडकमा फेरि क्षति पुगेको थियो । 

 ठाडो खोलाले खोलेर जग उतारेको कुलुङखोला पुलको जगमा  सिमेन्टको कङ्क्रिट भर्ने काम भने सम्पन्न गराइसकेको सडक सुधार आयोजनाले जनाएको छ ।