काठमाडौं- नेकपा एकीकृत समाजवादीका सम्मानित नेता झलनाथ खनालले समाजवादी मोर्चाका कार्यक्रममा बोलाउन छाडेकाले आफू अनुपस्थित हुँदै आएको बताएका छन् ।

पछिल्लो समय अध्यक्ष माधव नेपालसँगको बढ्दो दूरी र पार्टीबाटै खुरुखुरु निस्केर जान खनाललाई उर्दी जारी भएपछि शनिबार एक अन्तर्वार्तामा नेता खनालले ‘समाजवादी मोर्चाले बोलाउन छाडेको बताए । उनले ‘नबोलाएको ठाउँमा के जानु र ?’ भन्ने प्रतिक्रिया दिएका छन् ।

सञ्चारकर्मीसँग उनले भने, ‘हेर्न सुन्न मात्रै भने त यहाँ टेलिभिजनमा तपाईंहरुले देखाइहाल्नु हुन्छ, मजाले त्यही हेर्‍यो, सुन्यो, सबै देखिन्छ फेरि, त्यहाँ बसेर हेर्दा त एउटा कोणमात्र देखिन्छ।’

उनले थपे, ‘मलाई स्वाद केमा आउँछ भन्दाखेरि तपाईंहरुले टेलिभिजनबाट देखाइरहेका चिजहरु जो कुनाकाप्चा सबै घुमाई घुमाई देखाउनुहुन्छ, कतिपय नेता उँघेको पनि देखाउनु हुन्छ । कतिपय नेताहरु खासखुस गरेको पनि देखाउनुहुन्छ, त्यो हेर्न पाइन्छ नि । त्यसकारण त्यो स्वादिलो छ ।’