काठमाडौं- नेकपा एकीकृत समाजवादी पार्टीका सम्मानित नेता झलनाथ खनालले पूर्वराष्ट्रपति विद्यादेवी भण्डारी पार्टी राजनीतिमा आउनलाई संविधानले नरोकेको बताएका छन् ।

एकीकृत समाजवादीका अध्यक्ष माधव नेपालले पार्टी छाडेर जान चुनौती दिएपछि अन्तरसंघर्षमा रहेका खनालले एक अन्तर्वार्तामा वामपन्थीहरु मिलेर जाने अवस्थामा एमालेलाई अगाडि बढाउन सके भण्डारीको कदमलाई समर्थन गर्ने बताए ।

खनालले भने, ‘नेकपा एमालेलाई लचिलो पार्टीका रुपमा विकास गर्ने, सबै वामपन्थी दलहरु मिलेर जाने अवस्थामा त्यो पार्टीलाई पुर्‍याउने वामपन्थीहरुका बीचमा साझा आधारहरुमा एकताबद्ध गर्ने, साझा मोर्चा निर्माण गर्ने र आगामी चुनावमा पनि त्यो ढङ्‍गले प्रतिस्पर्धा गरेर जान सक्ने हिसाबले म एमालेलाई त्यसरी खडा गर्छु, भन्ने प्रतिबद्धताका साथ आउने हो भने त्यो चाहिँ बढो राम्रो कुरा हुन्छ, त्यसमा मेरो समर्थन हुन्छ ।’