काठमाडौं- नेकपा माओवादी केन्द्रमा पछिल्लो समय अध्यक्ष पुष्पकमल दाहाल प्रचण्ड र उपमहासचिव जनार्दन शर्माबीच अन्तरविरोध बढ्दो छ । यसै समयमा पार्टीको स्थायी कमिटीको बैठक बसिरहेको छ ।

बैठकमा अध्यक्ष प्रचण्डको प्रस्तावमाथि नेताहरुले धारणा राख्ने क्रम जारी छ । बैठकमा हरेक वक्तालाई १० देखि १५ मिनेटको समय दिइएको छ ।

मध्यपहाडी लोकमार्ग केन्द्रित अभियान, केन्द्रीय समितिको बैठको मिति तय गर्ने, समाजवादी मोर्चालाई थप विस्तार गर्ने, संगठन निर्माण, कार्यविभाजन र आन्तरिक एकतालाई सुदृढीकरण गर्ने, बाढी पहिरो जस्ता प्राकृतिक प्रकोप, संसदमा विचाराधीन विधेयक, जनजीविका लगायत समसामयिक प्रस्ताव तयार गर्नेसम्बन्धी एजेण्डा छन् ।

शनिबार बिहान ११ बजेबाट पार्टी केन्द्रीय कार्यालय पेरिसडाँडामा सुरु भएको बैठकमा समसामयिक राजनीतिक घटना क्रमबारे छलफल भइरहेको एक नेताले जानकारी दिए । पछिल्लो समय चर्किंदै गएको अन्तरविरोध हल गर्ने विषयमा विधि र प्रक्रियाबारे बढी छलफल केन्द्रित हुने बताइएको छ ।